Conseil départemental des Bouches-du-Rhône

Département des Bouches-du-Rhône

En provençal

Notre rubrique dédiée à la langue provençale met en avant, en dialecte rhodanien, quelques-uns des livres incontournables de la cuisine provençale ! Une belle occasion de rappeler en cette année de la gastronomie que les recettes ne manquent pas pour continuer de faire de la Provence un paradis " où l’on se régale le palais ”...

LOU SOUVENI FRANCÉS LA MEMÒRI DINS LA VIDO VIDANTO

Despuei qu’espeliguè lou Souveni francés en 1887, mai de 10 milien de Francés li an un jour pres sa carto. Vuei, l’assouciacien comto aperaqui 200 000 sòci recampa dins 1 600 coumitat loucau. Autant d’ome e de fremo que, pèr sa moubilisacien bountouso, fan viéure cade jour la memòri de toui lei que soun mouart pèr la Franço, que siegon Francés o estrangié. Ensinto, chasco annado, un pau pertout sus noueste territòri e dins uno quaranteno de peïs, de milié d’iniciativo van soun trin en coumplissènt uno messien triplo diant au tèms de vuei, grègo !

ENTRETENI …

Quand si saup que lou Souveni francés si boulègo proun pèr fin que pas uno toumbo de « Mouart pèr la Franço », pas un mounumen, pas un pieloun coumbatènt siguèsse leissa en bando, coumprenèn que lou pres-fa siegue dei gros. Verai, uno moulounado de croues de famiho van à la desbrando pèr mant uno rasoun (supressien dei councessien perpetualo, alunchamen dei famiho...). Un còup signala, vous lei fan toumba e lei rèsto dei bataiadou rejougnon lou croues coumun... E coumo pèr uno trufarié de la fourtuno, lei qu’èron aièr counouissu soun nega pèr sèmpre dins lou demembrié en leissant simboulicamen mai de plaço ei bataiadou anounime retrouba sus lou prat bataié. Dóu meme biais, leis assouciacien d’encian coumbatènt que pau à cha pau davalon despietadousamen vous dounon l’esplico proumiero de l’abandoun de milanto pieloun e lauso aubourado vo pauvado tout de long deis an. Pèr teni aquelo escoumesso, lou Souveni francés entretèn, renovo emai flouris de milié de site de coutrìo emé lei couleitiveta territourialo.

COUNMEMOURA …

Autre coustat de sa messien, lou Souveni francés bèn gardo de counserva toui lei ceremounié qu’an pèr toco de caviha la remembranço d’un evenimen istouri. Lei journado naciounalo counmemourativo, lou pus souvènt istituïdo à la demando d’assouciacien d’encian coumbatènt vo d’uno coumunauta mancon pas e recampon majamen lei que soun istòri siéuno es ligado à l’evenimen remembra : pèr memento, cinq journado fuguèron creado entre 1919 e 1954 e vue entre 1993 e 2019. Pamens, aquéstei temouin d’aquito (resistènt, depourta, coumbatènt d’Indouchino, coumbatènt d’Argerìo…) s’escachounon inmancable e la questien de manteni un calendié counmemouratiéu naciounau autant drud es vuei pauvado. Maugrat tout, lou Souveni francés, fouart de soun armado de sòci emai de sei pouerto-drapèu, rèsto enca foueço moubilisa subretout pèr lou 8 de mai, lou 14 de juiet, lou 11 de nouvèmbre coumo tambèn pèr lei ceremounié dóu 1é de nouvèmbre.

TRASMETRE …

Tresèime coustat de sa messien, la trasmessien pròchi lei nouvèllei generacien. Em’aquesto idèio fouarto que pas un elèvo de nouesto escolo republicano duou la quita sènso agué vesita au mens un ròdou memouriau coumbatènt e agué pres sa part au mens à-nuno ceremounié patrioutico. Segur qu’es uno toco deis ambiciouso mai que poudès pas manca quand souvetas que lou partàgi de l’istòri « ligue » la Nacien e quand sias assegura que « de pas saupre l’istòri es si coundana de la tourna viéure… ». Pèr acò, lou Souveni francés si boutè au sarvìci dóu mounde de l’educacien en pourgènt justamen de sòu pèr paga de vouiàgi memouriau ourganisa pèr de milié d’ensignaire. Ensinto, chasco annado, lei diferènt coumitat d’un lue suvenciounon de proujèt pèr ana sus lei prat bataié de 1914-1918, lei plajo dóu desbarcamen, lei ròdou dóu maquis vo lei camp de depourtacien. Autant d’elemen que counfiermon que lou Souveni francés countùnio d’amerita, pecaire, nouesto recounouissènço touto, noueste plen soustèn bèn-voulènt emai atiéu. Que chascun dounc dins soun entour fague sèmpre avans pèr empura nouèstei joueine à li garda sa bouono plaço. Longo mai dounc au Souveni francés !

VA SABIAS ACÒ ? LOU SOUVENI FRANCÉS À SA DEBUTO… “DIALÈITE MARITIME”

Refusant l’encaparramen de l’Alsaço-Lourreno pèr l’Alemagno après la desfacho de 1871, Francés-Savié Niessen, proufessour alsacian, vouguè moustra l’estacamen deis Alsacian-Lorren à la Franço en mantenènt lou souveni dei prouvinço perdudo. Si pensè que l’entre-tenènço dei croues devié permetre de garda presènt dins leis esperit lou souveni dei mouart pèr la Franço emai lou sentimen de l’unita naciounalo. Fouero-bandi en Franço en 1887, foundè dounc lou Souveni francés, à Neuï-sus-Sèino. L’assouciacien counouiguè un espandimen espetaclous emé l’espelimen de mant un mounumen, pieloun e lauso e coumtè deja, tre 1900, 80 000 sòci recampa dins 854 coumitat cantounau ! A l’epoco, èro proun coumun de vèire la pichouno e la grando patrìo parla naturau d’uno memo voues : pèr eisèmple, en Alsaço, pèr Toussant, lei chato depausavon de coucardo sus lei toumbo dei sourdat de sa coumuno... emé lou vièsti terradouren !